ايامنا والليالي

أيامنـا والليالـي كــم نعاتبـهـا

شبنا وشابت وعفنا بعض الأحوالـي

تاعـد مواعيـد والجاهـل مكذبهـا

واللي عرف حدها من همهـا سالـي

إن أقبلت يوم مـا تصفـى مشاربهـا

تقفي وتقبل وما دامت علـى حالـي

فـي كـل يـوم تورينـا عجايبهـا

واليوم الأول تراه احسن مـن التالـي

أيـام فـي غلبهـا وايـام نغلبـهـا

وايـام فيهـا سـوا والدهـر ميالـي

جربت الأيـام مثلـي مـن يجربهـا

تجريب عاقل وذاق المـر والحالـي

نضحك مع الناس والدنيـا نلاعبهـا

نمشي مع الفي طوع حيث ما مالـى

كم مـن علـومٍ وكـم آداب نكسبهـا

والشعـر مـازون مثقـالٍ بمثقالـى

اعرف حروف الهجاء بالرمز واكتبها

عاقل ومجنون حاوى كل الاشكالـى

لكن حظـي ردي والـروح متعبهـا

ما فادني حسن تاديبـي مـع أمثالـي

إن جيت ابي حاجةٍ عـزت مطالبهـا

العفو ما واحدٍ في النـاس يـا والـى

قومٍ الـى جيتهـم رفـت شواربهـا

بالضحك واقلوبها فيها الـردا كالـى

وقومٍ الى جيتهـا صكـت حواجبهـا

وابد ت لي البغض في مقفاي واقبالي

مـا كنـي إلا حــال مغضبـهـا

والكل في عشرتـه ماكـر ودجالـي

يا حيف تخفي أموراً كنـت حاسبهـا

واللي على بالهـم كلـه علـى بالـي

الجار جافـي وكـم قـومٍ محاربهـا

والأهل وأصحابنا والـدون والعالـي

والروح ويش عذرها في ترك واجبها

راح الحسب والنسب في جمع الأموالي

نفسي تبى العز والحاجـات تغصبهـا

ترمي بهـا بيـن أجاويـد وانذالـي

المال يحـي رجـالاً لا حيـاة ابهـا

كالسيل يحي الهشيـم الدمـدم البالـي

عفت المنازل وروحي يـوم اجنبهـا

منها غنيمه وعنهـا البعـد أولا لـي

لا خير في ديرةٍ يشقى العزيـز ابهـا

يمشي مع الناس فـي هـمٍ وإذلالـي

دارٍ بهـا الخـوف دومٍ مـا يغايبهـا

والجوع فيها ومعها بعض الاحوالـي

جوعى سراحينهـا شبعـى ثعالبهـا

الكلـب والهـر يقـدم كـل ريبالـي

عز الفتى راس ماله مـن مكاسبهـا

يا مرتضي الهون لا عزٍّ ولا مالـي

دللت بالروح لين ارخصـت جانبهـا

وانا عتيبي عريـب الجـد والخالـي

قومٍ تدوس الافاعـي مـع عقاربهـا

ولها عزايـم تهـد الشامـخ العالـي

خل المنـازل وقـل للبيـن يندبهـا

يبكي عليهـا بدمـع العيـن هطالـي

لا تعمر الـدار والقـالات تخربهـا

بيع الردي بالخساره واشتـر الغالـي

ما ضاقت الأرض وانسدت مذاهبهـا

فيهـا السعـه والمراجـل والتفتـالِ

دارٍ بــدار وجـيـرانٍ نقاربـهـا

وارضٍ بأرض وأطـلالٍ بأطلالـي

والناس اجانيب لين إنـك تصاحبهـا

تكون منهـم كمـا قالـوا بالأمثالـي

الارض لله نمشـي فـي مناكبـهـا

والله قـدر لـنـا أرزاق وآجـالـي

حـث المطايـا وشرِّقهـا وغرِّبهـا

واقطع بهـا كـل فـجٍّ دارسٍ خالـي

واطعن انحور الفيافي فـي ترايبهـا

وابعد عن الهم تمسي خالـي البالـي

مـن كـل عمليـةٍ تقطـع براكبهـا

فدافـد البيـد درهــامٍ وزرفـالـي

تبعدك عـن دار قـومٍ ودار تقربهـا

واختـر لنفسـك للمنـزال منزالـي

لو متّ فـي ديـرةٍ قفـراً جوانبهـا

فيها لوطى السباع الغبـس مدهالـي

اخير من ديـرةٍ يجفـاك صاحبهـا

كـم ذا الجفـا والتجافـي والتعلالـي

دوس المخاطر ولا تخشـى عواقبهـا

الموت واحد وبعـد العـز يجلالـي

ان المنـايـا إذا مــدت مخالبـهـا

تدركك لو كنت في جو السما العالـي

ما قرت الاسد فـي عالـي مراقبهـا

تسعى على الرزق ما حنت للاشبالـي

والشمس في برجها والغيـم يحجبهـا

تقفي وتقبل لها في العـرش مجدالـى

رب السماوات يا محصـي كواكبهـا

يا مجري السفن في لجات الأهوالـي

ضاقت بنا الأرض واشتبت شبايبهـا

والغيث محبوس يا معبود يـا والـي

يا الله مـن مزنـةٍ هبـت هبايبهـا

رعادها بات له في البحـر زلزالـي

ريح العوالي مـن المنشـا تجاذبهـا

جذب الدلى من جباء مطوية الجالـي

ديمومـةٍ سبلـت وأرخـت ذوايبهـا

وانهل منها غزيـر الوبـل همالـي

تسقي دياراً شديـد الوقـت حاربهـا

ما عاد فيها لبعض النـاس منزالـي

يا جاهـل اسمـع تماثيـلاً مرتبهـا

فيها معانـي جميـع القيـل والقالـي

مثل المحابيـب زادت فـي قوالبهـا

في صرفها زايده عن قرش واريالـي

يا ربي توبـه وروحـي لا تعذبهـا

يوم القيامه إذا مـا ضاقـت اعمالـي

وازكى صلاةٍ على المختار نوهبهـا

شفيعنا يـوم حشـرٍ فيـه الأهوالـي

وازكى صلاةٍ على المختار نوهبهـا

شفيعنا يـوم حشـرٍ فيـه الأهوالـي

وازكى صلاةٍ على المختار نوهبهـا

شفيعنا يـوم حشـرٍ فيـه الأهوالـي

تحيااتي

♥♥♥ By Gu$t Boy♥♥♥